रसुवामा बाढीका कारण तीन प्रहरीसहित १८ बेपत्ता, नौजनाको उद्धार

काठमाडौं । चीनबाट आएको बाढीमा परेर रसुवामा १८ जना बेपत्ता भएका छन् । रसुवाका प्रमुख जिल्ला अधिकारी अर्जुन पौडेलका अनुसार जिल्लाको टिमुरेमा बाढीले १८ जना बेपत्ता भएका हुन् ।

तीनजना प्रहरी, चारजना चिनियाँ कामदारसहित १८ जना बेपत्ता भएका र नौजनाको उद्धार गरिएको उनले बताए । उनले ड्राइपोटमा काम गर्ने केही ड्राइभर, लेबर (मजदुर) लाई पनि बाढीले बगाएको हुनसक्ने भन्दै जानकारी आएको भएपनि हालसम्म पुष्टि भने हुन नसकेको बताए ।

बाढीले रसुवागढीको मितेरी पुल र दर्जनौँ गाडी बगाएको छ । भीषण वर्षासँगैको बाढी र पहिरोका कारण नेपाल–चीन जोड्ने मितेरी पुल बगाएको हो । यससँगै रसुवा हुँदै चीनसम्मको मार्ग बिच्छेद भएको छ ।

यस्तै भन्सारको यार्ड (ड्राइपोट) मा रहेका १०० देखि १५० वटा गाडीमध्ये अधिकांश बाढीले बगाएको छ । ड्राइपोटमा काम गर्ने केही ड्राइभर, लेबर (मजदुर) लाई पनि बाढीले बगाएको हुनसक्ने जानकारी आएको छ । क्षतिको थप विवरण र सूचना संकलन गर्ने काम भइरहेको स्थानीय प्रशासनले जनाएको छ ।