पुँजी बजार सुधारका लागि व्यापक योजना, सेबोनले अघि बढायो समयबद्ध कार्ययोजना

काठमाडौं। नेपाल धितोपत्र बोर्ड (सेबोन) ले पुँजी बजारलाई थप व्यवस्थित, पारदर्शी र विश्वसनीय बनाउन व्यापक सुधार योजना अघि बढाएको छ। बोर्डले आगामी एक साताभित्र पुँजी बजार विकाससम्बन्धी मार्गचित्र सार्वजनिक गर्दै त्यसलाई चरणबद्ध रूपमा कार्यान्वयन गर्ने तयारी गरेको जनाएको छ।

बिहीबार जारी विज्ञप्तिअनुसार धितोपत्र बजारमा देखिएका विद्यमान समस्या समाधान, बजारको स्थायित्व कायम, पारदर्शिता अभिवृद्धि तथा लगानीकर्ताको विश्वास सुदृढ गर्ने उद्देश्यले समयबद्ध कार्ययोजना तयार गरिएको छ। बोर्डले सुधार कार्यक्रमलाई लगानीकर्ता हित संरक्षणसँग जोडेर अघि बढाउने स्पष्ट गरेको छ।

सेबोनले मार्जिन कारोबारलाई व्यवस्थित बनाउने, बजार अनुशासन सुदृढ गर्ने, जोखिम व्यवस्थापनलाई प्रभावकारी बनाउने तथा नियामकीय निर्देशनको पूर्ण पालना सुनिश्चित गर्न सम्बन्धित सबै पक्षलाई निर्देशन दिएको छ।

बोर्डका अनुसार सार्वजनिक निष्कासन (आईपिओ), धितोपत्र दर्ता तथा निष्कासन प्रक्रिया, नियमन प्रणाली र संस्थागत सुशासनमा व्यापक सुधार गरिनेछ। यसका लागि धितोपत्रसम्बन्धी ऐन, नियमावली तथा विभिन्न निर्देशिकाको पुनरावलोकन भइरहेको जनाइएको छ। अन्तर्राष्ट्रिय अभ्यास र बजारको आवश्यकता अनुरूप कानुनी तथा नियामकीय संरचनालाई समयानुकूल परिमार्जन गर्ने तयारी पनि बोर्डले गरेको छ।

विज्ञप्तिमा पछिल्लो समय पुँजी बजारमा देखिएको उतारचढावसँगै विभिन्न अफवाह र अपुष्ट सूचनाले लगानीकर्तामा अन्योल सिर्जना गरेको उल्लेख गर्दै त्यस्ता भ्रामक सूचनाप्रति सचेत रहन आग्रह गरिएको छ। विशेषगरी सामाजिक सञ्जाल तथा अनौपचारिक माध्यमबाट फैलाइने हल्ला वा बहकाउपूर्ण सूचनाको आधारमा लगानी निर्णय नगर्न बोर्डले अनुरोध गरेको छ।

बोर्डले लगानीकर्तालाई आफ्नै अध्ययन, विश्लेषण तथा जोखिम वहन क्षमताको मूल्याङ्कन गरेर मात्र लगानी गर्न सुझाव दिएको छ। साथै कम्पनीको वित्तीय अवस्था, व्यावसायिक सम्भावना, बजारको समग्र अवस्था तथा आधिकारिक स्रोतबाट प्राप्त सूचनाको आधारमा मात्रै लगानीसम्बन्धी निर्णय लिनुपर्नेमा जोड दिएको छ।

सेबोनले बजारमा अनुशासन कायम गर्ने, पारदर्शिता बढाउने, नियमन प्रणालीलाई थप प्रभावकारी बनाउने तथा लगानीकर्ताको विश्वास पुनः स्थापित गर्ने लक्ष्यसहित सुधारका कार्यक्रम कार्यान्वयनमा ल्याइने जनाएको छ। बोर्डले प्रस्तावित सुधार योजनाले नेपालको पुँजी बजारलाई थप आधुनिक, व्यवस्थित, पारदर्शी र विश्वसनीय बनाउने विश्वास व्यक्त गरेको छ।