संस्थागत निक्षेप लगानीको लागि राष्ट्र बैंकको प्रस्ताव, बैंक तथा फाइनान्स कम्पनीमा तीन अर्ब १४ करोड राखिने

काठमाडौं । नेपाल राष्ट्र बैंकले तीन अर्ब १४ करोड दुई लाख रुपैयाँ संस्थागत निक्षेप लगानी गर्नै भएको छ ।

राष्ट्र बैंकले वाणिज्य बैंक, बिकास बैंक र फाईनान्स कम्पनीको मुद्धती निक्षेपमा उक्त परिमाणको रकम लगानी गर्न लागेको हो । बैंकको बिभिन्न कोषमा रहेको रकम तीन सय ६६ दिने मुद्धती निक्षेपकोरुपमा लगानी गर्न प्रस्ताव आव्हान गरिएको राष्ट्र बैंकले जनाएको छ ।

राष्ट्र बैंकका अनुसार रकम लगानीको अवधि जुन १७, २०२५ देखि जुन १७, २०२६ सम्म रहेको छ । रकम लगानी गर्न चाहाने बैक तथा फाईनान्स कम्पनीले यही जेठ २३ गतेसम्म लगानी गर्न चाहेको रकम र दिन चाहेको व्याज समेत तोकेर प्रस्ताव पेस गर्नुपर्ने छ ।

लगानीको लागि छुट्याईएको कुल रकम मध्ये वाणिज्य बैंकहरुको लागि दुई अर्ब ५१ करोड २२ लाख, बिकास बैंकहरुको लागि ४७ करोड १० लाख र फाइनान्स कम्पनीहरुको लागि १५ करोड ७० लाख रुपैयाँ छुट्याईएको छ ।