४३ अंकले बढ्याे नेप्से, ५ अर्ब ६६ करोडको कारोबार

काठमाडौँ । दसैँ बिदापछिको दोस्रो दिन पनि सेयर बजार परिसूचक नेप्सेको वृद्धिले निरन्तरता पाएको छ । बुधबार बजार परिसूचक ४३.२२ अंकले बढेको हो । यो वृद्धिसँगै बजार परिसूचक २७४२.८८ विन्दुमा पुगेको छ ।

आज बजारमा १ करोड ३२ लाख कित्ता शेयर खरिद-बिक्री बढ्दा कारोबार रकम ५ अर्ब ६६ करोड पुगेको छ ।

बजारमा आज २४४ कम्पनीको कारोबार भएकोमा २०६ कम्पनीको सेयर मूल्य बढेको छ । ३५ कम्पनीको मूल्य घट्दा तीनवटा कम्पनीको सेयर मूल्य स्थिर रहेको छ । आज कारोबार भएका कम्पनीमध्ये अपर स्याङ्जा हाइड्रोपावरको मूल्यमा नकारात्मक सर्किट लागेको छ भने विजय लघुवित्त र इष्टर्न हाइड्रोपावरको मूल्य ९ प्रतिशत भन्दा धेरैले बढेको छ ।

आज बजार अन्तर्गत सबै परिसूचक र उपसूचकमा वृद्धि भएको छ । सबैभन्दा धेरै वृद्धि व्यापारमूलक सूचकमा ३.४४ प्रतिशतले भएको छ । हाइड्रोपावर उपसूचक पनि आज २.१३ प्रतिशतले बढेको छ । मंगलबार सबैभन्दा धेरै बढेको फाइनान्स समूह भने आज सुस्ताएको छ । यो उपसूचकमा ०.८६ प्रतिशतको वृद्धि देखिएको छ ।