जेठ महिनामा सर्वाधिक घरजग्गा किनबेच, तराई क्षेत्रमा धेरै

काठमाडौं। यस वर्ष जेठ महिनामा सर्वाधिक घरजग्गा किनबेच भएको तथ्यांक सार्वजनिक भएको छ । जेठ महिनामा चालु आर्थिक वर्षकै सर्वाधिक धेरै घरजग्गा किनबेच भएको तथ्यांक सार्वजनिक भएको हो ।  भूमि व्यवस्थापन तथा अभिलेख विभागका अनुसार जेठमा ५६ हजार लिखत पारित भएको छ।

तर, यो पोहोर जेठको तुलनामा भने ८.४२ प्रतिशत कम हो । पोहोर जेठमा ६१ हजार १६१ लिखत पारित भएको थियो। आर्थिक गतिविधि सुस्ताउँदा पछिल्लो तीन वर्षदेखि शिथिल बनेको घरजग्गा कारोबार लयमा फर्किन सकेको छैन।

घरजग्गा कारोबार तराई क्षेत्रमा धेरै देखिएको छ । सुनसरीको इनरुवा मालपोत कार्यालयबाट सबैभन्दा धेरै २१५८ लिखत पारित भएको छ । यस्तै जनकपुरमा १९७८, झापाको भद्रपुरमा १७४०, मोरङको बेलवारीमा १७३२, सप्तरीको राजविराजमा १६५९, सिरहामा १३३८, सर्लाहीको मलंगवामा १२५४ र कैलालीको धनगढी मालपोतमा १२४९ लिखत पारित भएको विभागको तथ्यांक छ।